Հայաստանի պատվիրակությունը մասնակցեց Չինաստանի Նինբո քաղաքում կայացած՝ Կանաչ և կայուն զարգացման ֆորումին

29 ապրիլի, 2026

2026 թվականի ապրիլի 29-ին Կենսաբազմազանության կոնվենցիայի համաժողովի (COP 17) ՀՀ նախագահության հատուկ բանագնաց, դեսպան Մհեր Մարգարյանը և Չինաստանում Հայաստանի դեսպան Վահե Գևորգյանը ՉԺՀ Նինբո քաղաքում մասնակցել են Շանհայի համագործակցության կազմակերպության ներքո կայացած՝ Կանաչ և կայուն զարգացման ֆորումին (Green and Sustainable Development Forum of the Shanghai Cooperation Organization)։

Ֆորումին տեսաուղերձով հանդես է եկել Հայաստանի Հանրապետության փոխվարչապետ Մհեր Գրիգորյանը, նշելով կայուն զարգացման և բնապահպանության ոլորտներում Չինաստանի և ՇՀԿ հետ համագործակցությունը խթանելու ՀՀ պատրաստակամությունը, ինչպես նաև՝ այդ համատեքստում, անդրադարձ է կատարել հոկտեմբերին Երևանում նախատեսվող ՄԱԿ Կենսաբազմազանության համաժողովին։

Ֆորումի՝ «Պահպանելով համաշխարհային կենսաբազմազանությունը բազմակողմ կառավարման միջոցով» (Conserving Global Biodiversity through Multistakeholder Governance) խորագրով քննարկմանը ՀՀ նախագահության հատուկ բանագնաց Մ․Մարգարյանը ներկայացրել է COP17-ին ընդառաջ նախապատրաստական աշխատանքները, որպես համաժողովի ընթացքում նախատեսվող կարևոր առաջնահերթություն հիշատակել է COP 15-ի Չինաստանի նախագահության ընթացքում ընդունված Կունմին-Մոնրեալ գլոբալ կենսաբազմազանության շրջանակի ներքո ստանձնված հանձնառությունների իրականացումը գնահատելու գործընթացի մեկնարկը։

Միջոցառման շրջանակներում ՀՀ պատվիրակությունը հանդիպումներ է ունեցել նաև Չինաստանի բնապահպանության նախարար Հուան Ռունցիուի, Նինբոյի քաղաքապետ Թան Ֆեյֆանի, ինչպես նաև՝ Երևանում կայանալիք կենսաբազմազանության COP 17 համաժողովի թեմայով հարցազրույց ունեցել տեղական լրատվամիջոցների հետ։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր